Um SFH
SFH eru innheimtusamtök tónlistarflytjenda og hljómplötuframleiðenda. Tilgangur sambandsins er að gæta réttar flytjenda og útgefenda til þóknunar fyrir afnot af hljóðritum vegna spilunar á opinberum vettvangi..
SFH semur við útvarpsstöðvar og sjónvarpsstöðvar um þessi afnot. Ennfremur er í gildi verðskrá vegna notkunar tónlistar á veitingarstöðum, verslunum, líkamsræktarstöðvum og fleiri stöðum þar sem tónlist er spiluð opinberlega. Nánar um SFH
Hvernig virkar úthlutunarferlið?
Spurt og svarað
Hvers vegna þarf samtök eins og SFH til að innheimta gjöld vegna notkunar hljóðrita fyrir flytjendur og útgefendur tónlistar?
Gífurlegur kostnaður færi í það hjá hverjum og einum rétthafa að innheimta fyrir notkun verka sinna hjá öllum útvarpsstöðvum, verslunum, skemmtistöðum og öðrum opinberum stöðum sem leika tónlist af hljómplötum bein eða óbeint.
Sama er uppi á teningnum hjá rekstraraðilum (útvarpsstöðvum, verslunum, veitingastöðum o.fl.) sem þyrftu að greiða hverjum og einum rétthafa. Það sparar bæði tíma og kostað að ein samtök eins og SFH sjái um þessa innheimtu og umsýslu.
Hver er munurinn á SFH og STEF?
SFH gætir réttinda flytjenda og útgefenda hljóðrita. STEF gætir réttinda höfunda tónlistar. Ef þú ert bæði flytjandi tónlistar og höfundur tónlistar er æskilegt að vera skráður í bæði félögin.
Það kostar ekkert að vera meðlimur í STEF og SFH.
Hvernig gerist ég meðlimur í SFH?
Það er einfalt og fljótlegt að skrá sig í SFH. Það eina sem þú þarft að gera er að fylla út eyðublað og skrifa undir það með rafrænum skilríkjum. Þú getur skráð þig í SFH með því að smella hér.
Það er endurgjaldslaust að vera meðlimur í SFH.
Ég hef leikið inn á hljóðrit sem er spilað í útvarpi. Hvaða réttindi hef ég?
Allir flytjendur hljóðrita eiga rétt á greiðslu þegar hljóðrit er leikið á opinberum vettvangi. Þú þarft að vera skráð/ur sem einn af flytjendum hljóðritsins. Þú getur séð hvaða hljóðrit þú ert skráð/ur á inni á mínum síðum.
SFH sér síðan um að greiða þér þóknun eftir því hve hljóðritið er mikið spilað í útvarpi.
Skráning í SFH
Þú getur orðið aðili að SFH sem flytjandi ef þú hefur tekið þátt í upptöku á hljóðriti sem spilað er í útvarpi eða sjónvarpi. Það kostar ekkert að vera í SFH.
Tilkynning
Til aðila innan SFH: Rétt er að vekja athygli á að mánudaginn 11. maí n.k. kl. 15.00 verður að Rauðagerði 27, Reykjavík haldinn aðalfundur SFH. Á dagskrá eru venjubundin aðalfundarstörf og þar verður m.a. lögð fram eftirfarandi tillaga um stefnur SFH.
Nánar...
Ýmsar stefnur SFH sem lagðar verða fram til samþykktar á aðalfundi samtakanna þann 11. maí 2026
Lagt er til að eftirfarandi stefnur SFH verði samþykktar á aðalfundi SFH þann 11. maí 2026. Stefnur þessar eru í samræmi við ákvæði umsýslulaga nr. 88/2019.
Almenn stefna um úthlutun réttindagreiðslna til rétthafa
SFH úthlutar þóknunum á grundvelli 47. greinar höfundalaga annars vegar vegna notkunar útvarps- og sjónvarpsstöðva á útgefnum hljóðritum með tónlist og hins vegar spilunar tónlistar af hljóðritum á opinberum stöðum svosem verslunum, veitingastöðum og líkamsræktarstöðvum.
Almenn fjárfestingarstefna
Stjórn skal ávaxta fjármuni félagsins með tryggum hætti, einkum með vörslu á innlánsreikningum banka. Leitast skal við að ávaxta fjármuni félagsins með sem arðbærustum hætti.
Almenn stefna um frádrátt frá réttindatekjum og arðs af fjárfestingu þeirra
Áður en ákvörðun um úthlutun á réttindagreiðslum er tekin, skal stjórn draga frá tekjum öll rekstrargjöld og önnur útgjöld SFH auk framlags til stuðningssjóðs. Miða skal við fjárhæðir í samþykktum eins og þær koma fram í ársreikningi SFH á hverju rekstrarári. Leitast skal við að halda rekstrarkostnaði í lágmarki, án þess þó að það bitni á starfsemi félagsins. Stjórn er heimilt að setja sérreglur um mismunandi skiptingu á gjöldum til frádráttar af réttindagreiðslum eftir eðli þeirra.
Fjármagnstekjum skal ráðstafað við úthlutun til rétthafa með sama hætti og öðrum tekjum.
Notkun óráðstafanlegra fjárhæða
Ef rétthafi finnst ekki eða gerir ekki kröfu til áunninna réttinda, þegar 3 ár eru liðin frá þeim áramótum er rétthafi gat krafist úthlutunar hjá SFH eða IHM eða öðrum sambærilegum aðilum, er viðkomandi fjármunum ráðstafað aftur til úthlutunar og getur hvor deild (flytjendur eða framleiðendur) ákveðið hvernig þeim fjármunum verður úthlutað.
Til frekari skýringa er vísað til ákvæða úthlutunarreglna SFH á heimasíðu samtakanna.
Áhættustýringarstefna
Stjórn SFH leitast ávallt við að lágmarka áhættu við starfsemi SFH. Er það m.a. gert með því að ávaxta fé samtakanna með öruggum hætti eins og fram kemur í almennri fjárfestingarstefnu samtakanna.
Verði framangreindar stefnur samþykktar munu þær gilda áfram þar til þeim, einni eða fleiri, verði breytt á aðalfundi SFH.